فاكرين السبب في الثورات اللي احنا بنعيشها دلوقتي دي؟ السبب الأصلي؟
اسمه محمد... محمد بوعزيزي
محمد ولع في نفسه احتجاجا على معاملة الشرطة ليه بطريقة تسببت في اهانة كرامته
النتيجة؟ ثورة تونس وهروب بن علي - الرئيس التونسي الهارب...
بعدها نزل الشعب المصري - مش كله طبعا - كانوا تقريبا ٧٥ ألف في اول يوم... حد فاكر كانت مطالبهم ايه؟
عيش، حرية وايه؟؟ كرامة انسانية... فاكرين؟
مش حأفتي وأعمل زي اللي قاعدين يقولوا احنا كنا في التحرير وهما كانوا مستخبين في بيتهم مقضينها تليفونات ومسجات وتليفزيون وكده.... انا أصلا ماكنتش في البلد.... بس كنا بنعمل مظاهرات برضه، حتى شوفوا
يعني انا عميلة وبتاعة اجندات خارجية بس ماكنتش في الميدان.. طلعت زكريا و ابن مرتضى منصور بس اللي كانوا هناك
المهم.....
عرفت انزل اخيرا بعد تنحي المخلوع بتاعنا... مبارك .. وصلت القاهرة الخميس بالليل والجمعة الصبح كنت في الميدان... كان اول يوم جمعة بعد التنحى... شفت الدبابات واتصورت قدام وحدة - يمكن تنفع قدام يعني ولا حاجة... وكنت عاملة دماغ ثورة مالهاش حل... اللي شفته تاني يوم عمل لي احباط مايتوصفش
كنت عند أختي بأطمن عليها وفجأة سمعنا ضرب رصاص... وبما اني ماكنتش في ميدان التحرير وأخيرا جت لي فرصة جريت على البلكونة... ومعايا الكاميرا
شوفوا بقى جزء من اللي شفته
معلش الجودة وحشة بس ماكنتش باصور بالكاميرا بتاعتي.... اللي لاقيته قدامي بقى - وكمان مافيش عنف كتير لان كل اللي حصل كان بعيد وحبيت اوريلكم الحاجات اللي كانت باينة - مش ضباب يعني واحكيلكم الفيلم بعدين
المهم: القصة اتغيرت ١٠٠ مرة وانا واقفة بأصور.. من ان الجيش مسك تجار سلاح لتجار مخدرات لناس كانت بتبني على أرض مش ملكها وهددوا السكان بالسلاح وخدوا عندكم بقى كل واحد زود حتة... احتياطي يعني علشان لو القصة ماكنتش ممتعة او كان ناقصها تحابيش....
المشكلة بقى:
اولا: ماحدش شاف مين اللي ضرب رصاص.. بس اللي سمعته كانوا كام رصاصة ورا بعض ومن الفيديو ووقفتى السودا دي اقدر اقول بكل ثقة - ماشفتش سلاح الا مع الجيش
ثانيا: ايه؟؟؟؟؟؟ هي الثورة دي قامت لييييييييييه؟؟؟ ما قلنا كرامة انسانية؟!!!! هو مافيش مخ كده؟؟؟ الناس دي لو كانت اخطأت حاكمهم لكن ايه لزمة الضرب والاهانة دي؟؟ افرض بعد كل الاهانة دي طلعوا مظلومين... حترجع لهم كرمتهم ازاي؟؟
في ناس قعدت تفتي بقى: ده بس علشان البلطجية... اصل البلد في حالة حرجة... اصل المولود في خطر ولازم الجيش ينقذ ما يمكن انقاذه.... اصل الناس دي مش حتيجي غير كده.... اصل احنا مش لاقين اعذار فمشيها كده
مشكلتي مع اعذاركم ان اللي حصل ده كان بعد ايام قليلة جدا من التنحي - ولحد النهاردة كرامتنا بتتبعتر يوم ورا يوم
مشكلتي مش بس مع المجلس... مشكلتي كمان مع الجيش
No comments:
Post a Comment