Sunday 15 May 2011

٢٠١١... ويالها من سنة

مع نهاية ٢٠١٠ تخيلت ان كده خلاص... السنة الكئيبة دي خلصت وحنبتدي سنة احسن..... يمكن تكون احسن فعلا بس عامل الاثارة لم يتوقف للحظة

من اول ما رأس السنة هلت وكانت اول هدية لينا من ٢٠١١ هي تفجير كنيسة القديسين في اسكندرية.... لكن اللي حصل بعدها ماكنش اي حد يتخيله...

تونس تقوم بثورة وبن علي يهرب... مصر تقوم بالثورة وحسني يتنحى.... لا وايه الحوافريت جيمي والحوافريت علاء مشرفين في طره... فعلآ؟؟؟ ومبارك وسوزي مشرفين في مستشفى شرم الشيخ بعد ما خدوا ١٥ يوم كل واحد.... يااااااا رااااااااااااجل؟؟؟

بس بصراحة؟؟ اول مرة احس اني عايزة انزل مصر وماأرجعش.... اول جمعة نزلتها كانت بعد التنحي (وندمت جدا اني ماكنتش هناك قبلها) بس فعلا حاجة تانية خاااااااااااالص.....
قابلت ناس كنت اعرفها على النت بس.... وكسبت اخوات جداد :)

اقدر اقول بكل ثقة ان المصريين احسن ناس في العالم... المصريين اللي قابلتهم... وغير الناس اللي هنا خالص :))

اتعلمت ايه في الكام شهر دول؟؟ حاجات كتير اوي صعب تتكتب كلها بس ده ملخصها:

١- مش كل واحد يقول لك حاجة تصدقه.... لو قال لك انا كنت في التحرير غالبا بيكدب
٢- الثورة قامت علشان التغير.. كلنا لازم نتغير مش النظام بس
٣- كفاية كذب ونفاق.. لو عارف ان فلان حرامي قول ورزقك على الله
وبالمناسبة دي: الوزير سمير الصياد حرمي من ايام ما كان مستشار ثقافي في لندن
٤- المصريين - وخصوصا الشباب - اجدع ناس في العالم


اما الفيديوهات والصور فهما كتييييييييير واكيد حرفعهم.... بس واحدة واحدة


من مصرية مندسة صحبة اجندة خارجية وعميلة :)

2 comments: